KHAWTHLIR

DMR-ah blanket pe

Indian Red Cross Society, Mizoram State Branch chuan Disaster Management & Rehabilitation department hnenah blanket 300 an pe a; nimin khan DMR minister Prof. Lalnilawma hnenah a pisaah an hlan. Minister chuan, Mizorama Red Cross Society-te'n chhiatna thlenga mamawh tur blanket ṭhahnem tak an pe chu lawmawm a tih thu a sawi.

END-in rakzu man

Hnahthiala Excise & Narcotics department mite chuan nimin zing dar 3:55 khan Hnahthial Bazar Vengah rakzu litre 249 an man. Zu neitua puh Lalbiaktluanga (38) s/o Lalṭanpuia (L), Phunchawng Mel-8 leh zu phurhna WagonR MZ-01 AD-8855 pawh an man nghak a, nimin khan Lunglei District Court-ah an thawn nghal a ni.

Kawng khâr

Dinthar bazar aṭanga KM Higher Secondary School panna kawngah tuichhe paihna pipe phûm hna thawh a nih avangin nimin aṭang khan zing dar 9 leh tlai dar 5 inkarah KM Higher Secondary School lama Dinthar Bazar - Dawrpui Vengthar panna kawng khâr a ni a; hna thawh zawh hma zawng kawng khar a ni ang.

Governor ṭanpuina

Governor Discretionary Fund aṭangin nimin khan Serchhip district-a Adult Rehabilitation Centre, Beiseina In (Old Age Home), Zoar Urban Deprived Home, Unity Orphanage Home leh Shalom Special School-te hnenah ṭanpuina Rs 25,250 ṭheuh hlan a ni a; Serchhip district bawrhsap Paul L Khuma leh SDO (Sadar) Rebecca Laldinmawii Hrahsel-ten an awmna hmun ṭheuhah kalchilhin ṭanpuina hi an hlan a ni.

BLO training

Election Commission of India-in 'National Training Programme for Booth Level Officer' neih tura a tih angin nimin khan Mizorama Assembly Constituency hrang hrang - Aizawl South II, Aizawl South III, Champhai North, Champhai South leh South Tuipui huam­chhunga booth level officer (BLO) 1,301-te tan training buatsaih a ni a; Mizorama bial hrang hrangah July 17, 2025 thleng neih tura tih a ni.