CYMA-in ṭanpuina a pe chhuak

Central YMA chuan tun hnaia ruahsur nasa vanga Mizoram hmun hrang hranga chhiat tâwkte ṭanpuina a sem a; Champhai district-a Myanmar lam raltlante tan hmun pathumah ṭanpuina a pe bawk.

CYMA chuan YMA branch, group leh sub-headquarters aṭanga report an dawn aṭangin ruahsur nasa vanga chhiatna tuartute hnenah ṭanpuina Rs 13,07,000 an sem a; mitthi panga hnenah Rs 35,000 ṭheuh, leiminin a hnâwl in chhe vek neitu mi 28 hnenah Rs 20,000 ṭheuh, in ṭhiah leh in tlu chhe mai theia ngaih neitu mi 51 hnenah Rs 10,000 ṭheuh, Saichal YMA Library chhia leh Bungtlang West YMA Rûn chhiaah Rs 31,000 an pe. Ṭanpuina hi an awmna branch, group leh sub-hqrs kaltlanga pek a ni.

Tun hnaia Myanmar ram chhung, Mizoram depah inkahna a awm avanga sahimna zawnga Mizorama rawn lutte ṭanpuina atan CYMA ṭanpuina pe bawk a; ei leh in tur hrang hrang YMA Zokhawthar Branch hnenah Rs 3,00,000 hù leh Vaphai Branch hnenah Rs 2,00,000 hù an pe a, Champhai Sub-Hqrs hnenah Rs 1,00,000 an pe bawk.