Mizo nunah phût lêt nei loa mi dang puih duhna thinlung a bet tlat - Larsap

Governor Gen. Dr Vijay Kumar Singh, Indian Red Cross Society (IRCS), Mizoram State Branch president ni bawk chuan nimin khan Mualpuia Aizawl College-ah IRCS Mizoram State Branch tharthawhna hun a hmanpui a; Mizo nunah phût lêt nei loa mi dang puih duhna thinlung a beh tlat thu a sawi.

Larsap chuan, IRCS Mizoram State Branch tharthawh a ni leh hmalakna turte tlangzarh a ni chu a lawm thu a sawi a, "He hun hi Mizoram tana hun pawimawh tak, mahni mihringpuite tana rawngbawl kawnga hmalakna awmze nei leh intuaitharna a ni," a ti.

Mizoram chu tlawmngai pawl chak leh viak ṭha tak tak awmna a nih thu sawiin Gen. VK Singh chuan, "Mizo nunah phût lêt nei hauh loa mi dangte puih duhna thinlung a bet tlat a ni," a ti a; mi dangte rawngbawlsakna lama khawvel puma pawl hriat hlawh leh awmze nei taka kalpui IRCS Mizoram State Branch hmangin mite ṭanpuinaa rawngbawlna tihchak lehzual a nih thei dawn thu a sawi.

Mizorama Youth Red Cross Unit din hmasa ber Aizawl College leh a dawttu T Romana College te hnenah Governor hian institutional membership certificate a hlan a; IRCS Mizoram State Branch hruaitute hnenah life membership certificate a hlan bawk. College leh zirna-in hrang hrangte chu Youth Red Cross Unit din chho zel turin Larsap chuan a sawm nghal a ni.

Inkhawmah hian IRCS Mizoram State Branch chairman H Lalengmawia leh Aizawl College principal Lalbiakzuala te pawhin thu an sawi a; Aizawl College Youth Red Cross unit member-te tan basic life support leh first aid chungchang inzirtirna hun hman a ni bawk.