January - June 2025 chhungin Aizawl dist-ah thubuai 818 ziak lut

Aizawl district-a police station hrang hrangah kumin January-June thla chhung khan thubuai 818 ziah luh a ni a; Inner Line Permit (ILP) endikna aṭangin dan bawhchhia mi 195 man an ni.

Aizawl SP Rex Zarzoliana Vanchhawng kaihhruaiin nimin khan SP conference hall-ah Aizawl District Crime Review Meeting neih a ni a, DIG (Nothern Range) Ashok Malik-a'n a hawng. Aizawl district-a sub-divisional police officer (SDPO) te, police station tina officer-in-charge (OC)-te leh investigating officer-te an tel.

Crime Review Meeting-a tarlan danin, January-June 2025 chhunga Aizawl district-a PS hrang hranga thubuai ziah luh 818 zingah inrawk leh rûkrûk thubuai a tam ber a, thubuai ziah luh zawng zawng aṭangin 65% a tling. Rûkrûk thubuai zinga 14% chu lirthei rûk thubuai a ni.

Kumina Aizawl district-a police-in thubuai an ziah luh tawh zinga 107 chu court-in a chingfel tawh a, court-in a chinfel tawh zinga 89%-ah thil sual tia puhte'n thiam loh an chang.

PS hrang hrangte'n ILP nei lo leh dik lo hmang an endik ṭhin a, kumin thla ruk chhung hian ṭum 41 ILP endik niin, dan bawhchhia mi 195 man an ni a, dan bawhchhiate chu thuneitute hnenah hruai zel an ni.

Aizawl khawpuia PS-te'n Central Equipment Identity Register (CEIR) portal hmangin mobile phone bo 284 an chhui chhuak a, a neitute hnenah pek let vek a ni tawh. Bawngkawn PS chu CEIR hmanga mobile phone bo chhui chhuak tam ber niin, 143 an chhui chhuak.

Crime Review Meeting-ah hian constable Ramengmawii, Bawngkawn PS chu mobile phone bo chhui chhuahnaah a thawh hlâwk avangin chawimawina hlan a ni. Ramengmawii hian thla li chhungin mobile phone bo 120 a chhui chhuak tih an tarlang.