Sorkarin research a chhawr ṭangkai - HTE Minister

Aizawl College chuan golden jubilee an lawmna kal zelah nimin khan an hmunah ni hnih awh tur national seminar an buatsaih ṭan a, Higher & Technical Education minister Dr Vanlalthlana'n a hawng a; sorkarin research a chhawr thu a sawi.

Dr Vanlalthlana chuan, sorkarin ram kaihhruai nan zirbingna (research paper)-te a chhawr ṭangkai mek thu a sawi a; mithiam kal khawmte chu zirna thûk zawk nei zel tur leh mahni lârna lam ni lo a, sorkar leh ram tana thil ṭha zawk zir chhuak a, a ṭulna leh ramin a mamawhna zâwnah nasa zawka insáwrbing zel turin a ngen.

Mizoram sorkara secretary H Lalengmawia pawhin thu sawiin, "Mizoram zirna-inte hi duhthusam ni chiah loh mah se, infrastructure lamah chuan kan ṭha thawkhat a, a tlukpui turin quality education lamah kan ṭan a ngai," a ti a; hriselna lam, ramri buaina, sorkar policy leh ram leh hnam thilah tun aia ril zawka zirchianna nei zel turin mithiamte a chah.

'Analyzing Contemporary Issues in North East India: Problems and Opportunities’ tih thupui hmanga zirhona hawn inkhawm Aizawl College principal Lalbiakzuala'n a kaihruai a; nimin khan research paper 31 zirho niin, vawiinah research paper 32 zirho leh a ni ang.

Aizawl College hi kum 1975 khan din a ni a, tunah hian BA leh BCom-ah zirlai 1,893 an awm mek a, MA (Education)-ah zirlai 40 an awm mek bawk. Kumin 2025 hi a kum 50-na (golden jubilee) a ni a, kawng hrang hranga lawm a nih tawh bakah, Foundation Day leh lawmna pui ber an la hmang leh dawn a ni.