Bilkhawthlir-Kolasib leh Kawnpui-Khamrang chungchanga NHIDCL hotu sawi a dik lo - PWD

Mizoram Public Works Department (PWD) chuan nimin khan Vairengte leh Sairang inkar National Highway kawngpui chungchangah thuchhuah an siam a; Mizorama NHIDCL Executive Director-in pawl (NGO) pali hruaitute hnena Bilkhawthlir-Kolasib leh Kawnpui-Khamrang inkar kawngte PWD enkawl lai anga a sawi chu thu dik tâwk lo a nih thu an tarlang.

PWD chuan, Vairengte-Sairang inkar kawng chu Ministry of Road Transport and Highways (MoRTH)-in July 3, 2020-a Gazette a chhuah angin NHIDCL enkawl tura tih a nih thu an tarlang a, "Bilkhawthlir-Kolasib leh Kawnpui-Khamrang kawng bik hi kum 2019-a resurfacing sanction hmuh a nih laiin, kawng siam hna thawh zawh a la nih loh avangin PWD chuan NHIDCL-ah a hlan (transfer) nghal lo. Hna thawh zawh a nih hian PWD chuan resurfacing tihna tur sum NHIDCL hnenah hlan tumin vawi tam tak hriattirna thawnin meeting-te a neihpui a, NHIDCL chuan Defect Liability Period zawh hma chuan an la duh lo," an ti.

PWD tarlan danin, Defect Liability Period a zawh hnu leh contract pakhat zawk tihtawp (terminate) a nih hnuah PWD-in NHIDCL-ah hlan tum leh a, mahse, NHIDCL-in an la duh chuang lo. Kawng chu NHIDCL lak tura tih (gazette-a chhuah) tawh a nih avangin PWD-in siamṭhatna tur estimate siam ṭhin mah se, MoRTH lamin an sanction thei lo.

MoRTH-in sum a pek tawh loh avangin Mizoram sorkar chuan kawng pawimawh a nih si avangin state sorkar sum hmangin a theih ang angin a enkawl zui ta a; kawng enkawlna atan Mizoram sorkarin kum 2024-25 khan cheng nuai 200 leh kum 2025-26 ah cheng nuai 111 chuang a pe a ni.