Industries Minister-in industrial unit-te EPIP-ah a hlawma dah dan tur a enfiah

Commerce & Industries minister F Rodingliana chuan nimin khan Export Promotion Industrial Park(EPIP), Lengte a tlawh a, industrial unit hrang hrangte awmze nei zawka industry azira a hlawma dah (plot) tur ruahmanna siam mek a enfiah.

F Rodingliana chuan, industry inangte hmun khata a hlawma dah khawm a nih chuan industry êkchhia (waste product) awmze neia hman ṭangkai theih a nih dawn thu a sawi a, "Raw material-te pawh a bo a bâng awm loin thil ṭangkai siam chhuah nan hman vek theih ka beisei," a ti.

Commerce & Industries Minister hian EPIP, Lengte chhunga hmasawnna hna thawh mekte bakah, industrial unit-te water supply mumal zawka pek dan turte a enpui nghal.

EPIP, Lengte re-plotting hna hi Commerce & Industries department leh PWD Chief Architech ten an buaipui mek a; industry ṭhuhmunte chu cluster khata dah khawm tur niin, EPIP chhunga inkalpawhna mumal zawka duan bakah, power supply line mumal zawka zam dan turte ruahmannaah telh a ni.

EPIP, Lengte chhunga industry-te tan dedicated power line siam dan turte Power minister ni bawk F Rodingliana hoin en nghal a ni. Ruahmanna ang chuan Sihhmui Sub-Station aṭanga 11 kV line hmanga EPIP chhunga industrial unit-te châwm tur liau liau line kaltir a ni ang.

Kawlphetha lak dan tur ruahmanna tihpuitlin a nih chuan industry-te tan power supply ṭha zawkin pek theih a ni dawn a, tunah chuan domestic consumer line dangte nen inthlun pawlh a nih avangin line dang siamṭhat dawna industrial area chhunga shutdown lak ngai ṭhin chu pumpelh a ni thei dawn a ni.