MRB leh MCAB ten lungawi lohna lantir

Central Trade Union-in nimina India ram puma General Strike an huaihawt chu Mizoram Rural Bank leh Mizoram Cooperative Apex Bank-a thawkte pawhin an zawm a; nimin khan MRB leh Apex Bank branch hrang hrangte khâr a ni.

Lungawi lohna lantir chhan chu, sorkar laipuiin labour code pali a siam duh loh lantirna a ni a, Regional Rural Bank (RRB) chuan an thil phûtte sorkar laipuiah an thehlut.

An thil phûtte chu - Initial Public Offerings (IPO) kalpui tum hnuhdawh te, RRB-te mimal kuta hlan (privatise) tumna hnuh kîr te, India ram state 28-a RRB-te National Rural Bank of India hnuaia dah khawm tumna sût te, RRB-a hna ruak hnawhkhah te, Schedule Caste/Tribe, Other Backwared Class, hmeichhia, rualbanlo leh sipai bángte tana kawng hawng zau zawnga ṭhalaite tan hna 30,000 chuang siamsak dan ngaihtuah te, RRB-a casual/part time leh daily-a thawkte dah ngheh te, Old Pension Scheme kalpui lehte a ni.

Nimina lungawi lohna lantirnaah hian Aizawlah chuan MRB Head Office, MINECO kawtah Aizawla MRB branch hrang hranga thawkte pungkhawmin, mi 150 chuang an tel a; an thil phûtte hmangin an au rual a ni.