Mizo Diaspora-ah Mizo pawl 133 leh mi 37,160 an inziak lut tawh

Mizoram páwna Mizote chanchin hriatna tur leh Mizoram sorkara an mamawh an thlen theihna tura duan Mizo DiasporaHub mobile application leh website (mizoram.diasporahub.in/) chu July 7, 2025 khan tlangzarh a ni. App leh website-ah hian Mizo pawl 133 leh mi 37,160 an inziak lut tawh.

Mizo Diaspora mobile app leh website hi Mizoram páwna chêng Mizote inhriatpawhna leh a ṭul anga inṭanpui tawnna tur te, Mizoram sorkar hmalakna an hriat theihna tur leh Mizoram sorkara an mamawhte an thlen theihna tura buatsaih a ni a; Mizo Diaspora Cell leh LushAITech-te thawhhona (Memorandum of Agreement) hmanga siam a ni.

Mizoram pawna awm Mizo pawl hrang hrangte chu Mizo Diaspora application/website-ah hian inziak lut tura ngen an ni a; nimin thleng khan zirlai pawl 15, welfare & religious pawl 10, welfare association 50 leh religious association 58 bakah, mi 37,160 an inziak lut tawh a ni.