LRS department kan fel tawh dawn - B Lalchhanzova

Land Revenue & Settlement minister B Lalchhanzova chuan nimin khan Saituala LRS pisa thar a hawng a; LRS department chu mipuiin dawr har tia an sawi ṭhin ni mah se, an intuai thar mek a, an fel tawh dawn thu leh, LRS office pui ber chu Aizawl DC hmunah a awm dawn thu a sawi.

Saitual LRS pisaah hian settlement officer hovin surveyor pathum leh thawktu dang pakua an awm a; Saitual SO hian in hmun leh ram pass 8,439 an pe chhuak tawh a ni.

LRS Minister chuan, mahni hna ṭheuh tih tak takna leh taimakna nena thawh chu Pathian rawngbawlna a nih thu a sawi a, "Revenue department dâwr har tia mipuite'n an lo sawi ṭhin chu ‘Kan fel tawh dawn' tiin kan intuai thar mek a, kan officer-te'n hetiang ṭawngkam an hmang hi a ropui hlein ka hria," a ti.

B Lalchhanzova chuan, minister a nih tirh lamah Revenue administration siamṭhat chu mite'n ‘a theih loh ang’ an tih thu sawiin, "Thawktute'n ‘i ngam lo ang’ min ti ṭhin. Mahse, hun a lo kal a, pawn lam aṭanga mi sawi ang ngawt a lo ni lo a, a chhungah chuan hnathawh tak tak duh hlir an lo awm khawm. Hma kan han la chho a, an hahzia te ka hmuhpui," a ti a; dik lo taka nawr lui lo turin mipui a ngen.

Revenue department inrêlbâwlnaah decentralization an kalpui dawn thu sawiin Lalchhanzova chuan, "Revenue office pui ber Aizawl DC hmunah a awm thei dawn a, Revenue administration hmangin decentralization kan kal pui dawn a, file pawh a tlem thei ang ber dawhkân kaltlangtir kan tum. Thingtlang aṭanga Revenue Director hmuh kher ngai tawh loin, district tina Revenue office-te hnenah thuneihna pek a ni dawn," a ti.

Revenue Minister chuan, Mizoramah land record nuai 3 chuang âwrh a awm laiin, Tripura chuan nuai 14 chuang an neih thu sawiin, "Lang chiang ta chu, ram teh duh pawh Revenue department-in kan teh chak tawk lo tihna a ni. Tunah chuan empanelled firm 13 kan nei tawh a, man neiin rawih theih an ni tawh," a ti a; licence surveyor nei tura hmalak mek a ni a, surveyor zir chhuak tawhte'n licence an nei ang a, mimalin rawih theih a nih dawn thu a sawi.

LRS department leh LESDE department thawkho turin hma an lak mek thu sawiin Lalchhanzova chuan, "ITI zirtirtute leh zirlaite hnenah an syllabus-a Revenue department-in telh tura kan duh te kan thlen dawn. Tunah chuan Mizorama ram pass zawng zawng kan computarise tawh a, loan pûkna atana pass dik lo hman leh pass dik lo lei a theih tawh dawn loh," a ti.

B Lalchhanzova chuan, sorkar hmasa hun laiin SEDP aṭangin Saitual leh a chhehvelah Buannel Geo Solution-in survey an neih thu sawiin, "Sum harsatna avangin duh angin an tipuitling thei lo a, an survey tawhte sem chhuak turin hmalak mek a ni. Periodic patta neih kawnga harsatna neite a rang lama tihfelsak an ni dawn," a ti a; Svamitva scheme (thingtlang LSC) hnuaiah khaw 28 chu drone hmangin ram thla lak a nih tawh thu leh a rang lamin ram pass pek chhuah an tum thu a sawi.

Saituala LRS department pisa hawnna hi bawrhsap Dr Lalngura Tlau-in a kaihruai a, LRS director R Lalṭhazuala'n technical report pein, district thar pathum zingah Saitual district chu Settlement Office puitling nei hmasa ber a nih thu a sawi. LRS secretary Vanlalmawia'n thu a sawi bawk.