CADC-ah Governor's Rule puang

11th Chakma Autonmous District Council (CADC)-ah sorkar mumal taka a kal theih loh avangin CADC chu thla ruk chhung atan Governor Rule-ah puan a ni.

District Council & Minority Affairs (DCMR) Secretary chuan nimin khan notification tichhuakin, Governor-in CADC thla ruk chhung atana Governor Rule-ah a puan thu a tarlang a; CADC-a thuneihnate chu Lawngtlai DC kutah dah a ni.

11th CADC atan hian March 2023 khan inthlan buatsaih a ni a, sorkar pangngai takin kal thei se chuan March 2028-ah an term tawp tur a ni. Governor Rule zawh hnua CADC kal zel dan tur chu Governor-in a la tichiang leh ang.