Ruihhlo do turin mahni inchhungkhur aṭanga hmalak a pawimawh - Prof. Nitea

Minister of state Prof. Lalnilawma chuan, ram leh khawtlang siamṭha tur leh chak zawka ruihhlo do tur chuan mahni inchhungkhur aṭanga hmalak ṭheuh a pawimawh thu a sawi.

Prof. Lalnilawma hian nimin khan a bial chhunga Thingsul-Tlangnuam community hall-ah MHIP Day lawmna a hmanpui a; ram leh khawtlang siamṭhat chu inchhungkhura ṭan tur a nih thu sawiin, "MHIP member-te'n kan chhungkua hi kan rawngbawlna leh kan mawhphurhna hmasa ber tur a ni. Mizoramah ruihhlo bâwiha tâng ṭhalai an tam a, ruihhlo do tur hian nute kan pawimawh a, kan tu leh fate ruihhlo laka an fihlim theih nan kan enkawl a, kan chhungkaw tan nasa zawka rawng kan bawl a pawimawh a ni," a ti.

MHIP member-te chu hawihhâwm tura chahin Lalnilawma chuan, "Nu ber an hawihhâwm chuan an tu leh fate an hawihhâwm a, hei hian a ṭha zawngin khawtlang a nghawng thei. Phût lêt nei miah loa mi dangte leh a mamawhte tana kan nun a pawimawh," a ti a; hmeichhiate'n an phâk tâwkin khawtlang, chhungkua leh an hmeichhiatpuite tan hna an thawh thu leh, kawng engkima chhungkua kaihruai theitu an nih avangin an pawimawh thu a sawi.