School calendar, uniform leh ṭan hun chungchangah inràwnkhawmna buatsaih

School Education department chuan nimin khan an conference hall-ah school calendar, school uniform inang tlang (common uniform) leh sikul ṭan hun chungchangah vantlang inràwnkhawmna, 'Public Consultation Meeting' an buatsaih.

Inrawnkhawmna hi School Education additional director Lalhmachhuana kaihhruaiin neih a ni a; chawhma lamah common uniform leh school academic calendar chungchang sawiho a ni a, chawhnu lamah school timing chungchang sawiho a ni.

School Education director Angela Zothanpuii chuan, common uniform leh school academic calendar chungchanga ngaihdante ziaka thehluh hun an hawnah ngaihdan ziaka thehlut mi 200 chuang an awm tawh thu a sawi a; sorkarin policy ṭha tak a duan dawn chuan a hmangtu turte ngaihdan hriat a pawimawh thu a sawi bawk.

School calendar, common uniform leh sikul ṭan hun chungchanga inrawnkhawmnaah hian State Council of Educational Research and Training (SCERT) director Caroline Zoramthangi leh officer dang te, Mizoram Board of School Education secretary Sarah Lalengzami Pachuau, School Education consultant Rev. Dr K Thanzauva, Samagra Shiksha leh Information & Public Relations department aiawhte an tel.

Zirtirtu pawl hrang hrang - Higher Secondary School Lecturers Association Mizoram, Mizoram Secondary School Teachers’ Association, Middle School Teachers’ Association leh Mizoram Primary Teachers’ Association aiawh te, Mizoram Education Inspecting Officers’ Association leh Mizoram Independent Schools Association aiawh te, Mizoram Journalists Association (MJA) leh Mizo Zirlai Pawl (MZP) aiawhte bakah, ziaka ngaihdan thehluttute an tel bawk.