Ramri hung chungchang sawiho

Saitual district Border Coordination Committee chu nimin khan Saitual DC Conference Room-ah an ṭhukhawm a, Committee chairman Dr Lalngura Tlau, bawrhsapin a kaihruai a; India leh Myanmar ramri hung tum leh a kaihhnawih thilte sawiho a ni.

Dr Lalngura Tlau chuan, India leh Myanmar ramri hung (fencing) leh ramria luh leh chhuahna (entry/exit) turte bakah, ramri chhehvela hnathawhte endik a, a ṭul anga hma la turin Border Coordination Committee din a ni tih a sawi a, "Sum dawn ve leh khaw hrang hrangah awareness campaign neih tum a ni," a ti.

Saitual Bawrhsap chuan, Border Roads Organisation (BRO) leh Assam Rifles te chu an hmalaknaah inhriattir tur pawimawh a awm chuan Committee hnena thlen ṭhin turin chah.

Indo-Myanmar ramri hung tumah hian luh leh chhuahna kawngka hmun 13-ah siam tum niin, thlan a ni tawh a; entry/exit point atana thlan zingah Saitual district-a Hrianghmun-Tuisa lui a tel.

Hrianghmun-Tuisa lui hi Border Coordination Sub-Committee Chairman (Saitual civil SDO), Assam Rifles leh BRO aiawhte'n an endik tawh niin, check post siam tur a ni. Checkpost piah lamah ramri chhehvela mipui lei tur hrang hrang zawrhna leh pho chhuahna tur border haat siam tura ruahman a ni bawk.