KHAWTHLIR

Kohhran thawhhona

Chhandamna Kohhran (Salvation Church of India) leh Fundamental Baptist Church of Mizoram ten thawhhona huang an din Joint Committee for Church Unity-a hruaitute chu July 6, Pathianni khan Edenthar Venga Chhandamna Kohhran biak-inah hlanna hun hman a ni a; thawhhona thuthlung ziah an inhlan tawn nghal.

MHIP Day hmanpui

AMC executive corporator B Lalawmpuii chuan nimin khan Chhinga Veng Branch MHIP-in Ropuk Huan, Lawipua MHIP Day an lawmna a hmanpui a; corporator C Lalchhandami pawhin Kanan Veng Branch MHIP-in Kanan Veng Multipurpose Community Hall-a MHIP Day an lawm a hmanpui bawk. MHIP Day hi July 6 a ni a, Pathianni a nih avangin branch tam ber chuan Inrinni khan an lawm a, nimin khan branch ṭhenkhatin an lawm ve leh a ni.

Scheme inhrilhfiah

Hnahthial District Industries Centre Conference Hall-ah nimin khan Commerce & Industries department hnuaia mipui tana hmaṭhatna tur scheme-te inhrilhfiahna buatsaih a ni a, district bawrhsap K Vanlalruati'n a hmanpuia. Sorkar hotute bakah pawl hrang hrang leh self help group aiawhte an tel a; Raising and Accelerating MSME Performance aṭangin Angel Business-te'n kal khawmte chu thil pawimawhte an zirtir a ni.

MNF inkhawm

MNF party chuan nimin khan Aizawla Mizo Hnam Runah chhung inkhawm an hmang a, MNF NCC member Tawnluia'n thu a sawi. Tawnluia hian MNF dintu Laldenga leh inremna thuthlung chungchang a sawi a, "Pu Denga hi India ram mai ni lo, khawvela Mizo hnam min pho langtu a ni a, Zo fate mai ni loin, ṭhangthar zelte hnam thinlung tuhtu a ni a, sawisela ngaihnêp theih a ni lo. Pu Denga hlutna hi kan hre chiang tulh tulh ang," a ti.