Laldenga thlânah pangpar an dah

Nimin July 7 kha MNF dintu leh chief minister hlui Laldenga thih champha a ni a, nimin zing dar 7 khan Treasury Square, Aizawla a thlânah MNF hruaitute'n hriatrengna pangpar an dah.

Laldenga hi July 11, 1927-ah Lunglei Pûkpuiah a piang a, kum 1944-ah British Indian Army a zawm. Kum 1959-ah Mizo National Famine Front a din a, October 22, 1961-ah Mizo National Front (MNF) tia thlak a ni. June 30, 1986-a inremna thuthlung ziah a nih hnuah Mizoram state sorkar lailawkah chief minister a ni a, kum 1987 inthlanpuiah chakin, chief minister a ni zui.

Cancer vangin Memorial Sloan Kettering Cancer Centre, USA-ah enkawl a ni a, Mizoram pana an haw kawngah Ashford Hospital, London-ah July 7, 1990 khan India huna tlai dar 2:30-ah a thi. July 13, 1990-ah vui a ni a, tun thlengin Mizo zinga state funeral-a vui awm chhun a ni.

Laldenga hriatrengna hun hmannaah hian MNF president Zoramthanga chuan, Pathianin Mizote Laldenga a pe chu Mizote vanneihna lungphûm pawimawh berte zinga mi a nih thu sawi a, "India ram mai ni lo, khawvela Mizo hnam min pho langtu a ni. Zo fate thinlungah hnam thinlung (nationalism) a tuh a, sawisela ngaihnêp tum awm ṭhin mah se, kan finna a sang tulh tulh a, Pu Denga hlutna hi kan hre chiang tulh tulh a ni," a ti.

MNF president Zoramthanga chuan, "Pu Laldenga hmanga Pathianin hnam thuthlung min pe hi a ropuiin a lawmawm hle a, kan thuthlung hi hnam dang pawhin min ît ngawih ngawih a ni," a ti a; Mizo hnam leh Mizoram a awm chhung chuan Laldenga hming a daih tawh loh tur thu a sawi.

Laldenga fanu Dr Renee Lalrinzuali pawhin thu sawiin, "Ka pa khan Mizoram hi a lo va hmangaih em ve aw, ka ti ṭhin. Kan chhungkua aiin Mizoram leh hnam a dah hmasa zawk ṭhin a. Mizoram tan a nih chuan keini kha chu min sacrifice a hreh lo hialin ka hria. Mizoram a hmangaihnaah a tum a thlen dawn chuan a nupui fanaute chu pahnihnaah min dah zawk ṭhin," a ti.