College zirtirtu qualify lote bàn phûtin zirlaite'n Aizawlah kawng an zawh

Mizoram sorkar college-a part time assistant professor mi 29-te chawlhtir phûtin nimin khan Aizawlah college zirlaite'n Mizo Students' Union (MSU) huaihawtin kawng an zawh. MSU chuan sorkarin college zirtirtu qualify lote insawifiah tura July 18, 2025 thleng hun a pek an ngaichang dawn a, sorkar hmalaknaah an lungawi loh chuan nasa zawka nawr an tum.

MSU huaihawt 'Quality Education Humhalhna Kawng­zawh' hi chawhma dar 11-ah Vanapa Hall kawtah ṭan a ni a, zirlai 1,000 vel telin, Higher & Techinical Education Directorate kawt thleng kawng an zawh a ni.

Kawngzawhnaah hian un-qualified part time assistant professor sorkarin a chhawr chhunzawm mekte chu báng tura an duh thu te, sorkarin thiamna neih ngai nei lo college zirtirtute contract a pawtsei chu an duh loh thu te, thiamna neih tur nei zo lo zirtirtute hnen aṭanga zirna dawn an duh loh thute an aupui a ni.

Kawngzawh tawp hnuah MSU hruaitute chu HTE Director-in a pisaah kâwmin, sorkarin hma a lak dante a hrilh a; zirlai pawl hruaitute'n an thil phûtte an sawi ve bawk.

MSU president B Lalkhawngaiha chuan, an duh ber chu part time assistant professor zinga qualify lote chhawr chhunzawmna tur order sût nghal a nih thu a sawi a, "July 18, 2025 a ral aṭanga file kal hun chhung ni 5 kan nghak leh ang a, chumi hun chhunga sorkarin a la bàn lo a nih chuan theitawpin a tawp thlengin hma kan la chhunzawm zel ang," a ti.

MSU President chuan, part time assistant professor (contract) zinga qualification neih ngai nei lote chu HTE Director-in July 3, 2025 khan thiamna neih ngai an la neih loh chhan sawifiah turin ni 15 hun an pe tih a lo hrilh thu a sawi.

An duh ber chu un-qualified part time assistant professor-te contract titawp a, bàn a nih thu sawiin MSU President chuan, "Bàn an nih theihna atana sorkar lamin court-ah thiam an chan ve theihna turin ni 15 chhung show cause notice an pe a, ni 15 (July 18) a ral hnu chuan zirtirtute hi an qualify lo a, zir chhunzawm tlak an nih loh chuan sorkar hian bân ngei a tum thu min hrilh a, kan lawm hle a ni," a ti.