School Edu. Review Meeting neih a ni; Syllabus-ah spoken Hindi telh dawn?

School Education minister Dr Vanlalthlana hoin July 4, Zirtawpni khan Secretariat conference hall-ah School Education department Quarterly Review Meeting neih a ni a; an thurel zingah sikul zirlai (syllabus)-a Hindi ṭawng zirna (spoken Hindi) telh chungchang a tel.

Ṭhutkhawmah hian Mizoram Education (Transfer & Posting) Rules, 2020 chungchangah July 18, 2025 hian mipui nena sawihona, public consultation meeting neih tura ruahman a nih thu tarlan a ni.

School syllabus-a spoken Hindi telh chungchang te, department inrelbawlna chherchhuan dan (administrative set-up) chungchang te, huam zau taka zirlai naupangte hmasawnna tehna Holistic Progress Card (HPC) chungchang te, pawl 8 chin hnuai lam elementary education-a textbook thar hman chungchang te, pawl 9 - 12 inkar secondary leh higher secondary education syllabus-a subject dah belh chungchang leh district hrang hrang aṭanga thurel tur lutte sawiho a ni.

Review meeting-ah hian Education consultant Rev. Dr K. Thanzauva, Mizoram Education Reforms Committee (MERC) working chairman Prof. Lalbiakdiki Hnamte, School Education department hnuaia office peng hrang hrang - Secretariat, Directorate of School Education, Directorate of SCERT, MBSE, Samagra Shiksha hnuaia officer-te leh District Education Officer-te an tel a ni.

ṬHUTKHAWMA TARLANTE

* Mizoram Education (Transfer & Posting) Rules, 2020 chungchangah July 18, 2025 khian public consultation meeting neih a ni dawn.

* Transfer & Posting Draft Rules hi School Education department website aṭanga download theih a ni.

* Draft rules-a rawtna leh sawi duh nei tan July 11, 2025 thleng merc.mizoram@gmail.com-ah theh luh theih a ni.

* Common exam question chu academic session 2025-26 kal meka second term exam lo awm tur aṭanga kalpui ṭan tur a ni.

* Common exam question kaltlang hian pawl 3-8 zirlaite'n zawhna inang an chhan theih nan ruahmanna kalpui mek a ni.