MRHGCD-ah recruitment system felfai zawk siam a ṭul - Home Minister

Mizoram Home Guards & Civil Defence (MRHGCD) chuan nimin khan Chawlhhmuna an hmunah Home minister K Sapdanga hoin review meeting an nei. Minister chuan, MRHGCD dinhmun chawisan a nih theih nan leh politics inrawlh loa hna lak a nih theih nan recruitment system felfai zawk siam a ṭul thu a sawi.

Home Minister chuan, "MRHGCD dinhmun chawisan a nih theih nan leh politics inrawlh loa hna lak a nih theih nan hna lak dan recruitment system felfai zawk siam a ṭul. Volunteer hna dilte tan hna dilna standard form siama open advertisement tih chhuah ni se," a ti a; educational qualification pawh tihsàn ni thei se a duh thu a sawi a ni.

MRHGCD-a volunteer-te chu ram leh mipui tana hna pawimawh tak tak thawktu an nih thu sawiin K Sapdanga chuan, "Sorkar hmun pawimawh vengtu, khuarel chhiat nikhuaa chhanchhuah leh chhawmdawl hna thawktu an nih bakah, law & order kenkawh kawnga police ṭanpuitu an ni," a ti.

Home Minister chuan, MRHGCD volunteer-te retirement benefit nei loa an awm reng chu veiawm a tih thu sawiin, "Mizoram Provisional Employee Savings Scheme 2024-ah an tel theih dan tur ngaihtuah a ṭul," a ti a; MRHGCD-a volunteer-te chu rál do tura ngaih ni lo mah se, ralthuam pek an nih thu leh a ṭul chuan rál do tura inring tur an nih thu sawiin, mi ṭha leh rintlak ngeite laka tuai hriam leh zirtir an ngaih thu a sawi bawk.

Home secretary Vanlalmawia pawhin thu sawiin, civil defence inrálrinna tihṭhat a ngaih thu te, MRHGCD hna chanpual tihchian lehzual a ṭul thu te, khawvel hmasawn leh changkang zel mila uniformed service-te pawhin tunlai thiamna hman ṭangkai dan an zir ve zel a pawimawh thute a sawi.

Ṭhutkhawmah hian MRHGCD commandant general cum director Maj. Zosangliana Hualngo kaihhruaiin MRHGCD inrelbawlna, thawktute chungchang, CTI Sesawnga Training Centre tihchangtlun dan turte leh hmachhawp dangte sawiho a ni.