Aptitude Challenge Examination buatsaih

Education minister Dr Vanlalthlana chuan June 28, Inrinni khan a bial chhunga Ramthar Veng Branch YMA Education Sub-Committee-in Ramthar Veng Aptitude Challenge Examination (RACE) 2025 an buatsaih hmáwrbâwkna leh result puanna a hmanpui.

Dr Vanlalthlana chuan, mi tumruhte'n hlawhtlinna an chan ṭhin rualin, hlawhchhamna tam tak pawh an nei ṭhin tih a sawi a, "Zirlaite hian nasa takin lehkha zir u la, kawng tinrengah hlawhtling thei vek lo mah u la, in nih tumah chiang ang che u. Hlawhchham châng pawha beidawng mai lo leh tumruhna nen theihtawp chhuah ngam ṭhinte chu a tawpa an hlawhtling ṭhin," a ti.

Ramthar Veng YMA-in zirna lama veng chhung hmasawnna tur ruahmanna an siam chu ṭha a tih thu sawiin Minister chuan, veng bil mai ni lo, ram tan pawha chhenfakawm a la nih ngei a beisei thu leh rah ṭha tak a chhuah ngei a beisei thu a sawi bawk.

Aptitude Examination-ah hian category paliah zirlai 300 chuang an tel a; veng chhung nu leh pate sum thawh tling khawm Rs 2,09,900 aṭangin lawmman siam a ni. Category I leh II-a pakhatnate'n Rs 5,000, category III-a pakhatnain Rs 8,000 leh category IV-a pakhatnain Rs 10,000 an dawng a; category tina top 10-te'n nomawi an dawn bakah, pakhatna aṭanga pangana ten nomawi leh pawisa an dawng a ni.