Mipui râwn chungin zirnaah hmalak tum; Transfer & Posting rules thar kan duang dawn - Education Minister

Education minister Dr Vanlalthlana chuan, zirna kaihhnawihah sorkarin mipui ráwn chung zelin hmalak a tum thu a sawi a; zirtirtu sawn chungchangah buaina a tam ṭhin avangin transfer & posting rules thar duan a nih tur thu a sawi bawk.

Education Minister hian June 28, Inrinni khan NE Khawdungsei Primary School-II a hawng a, sikul hotute hnenah computer a hlan nghal. Ngopa LTM High School leh NE Khawdungsei Higher Secondary School (lumpsum) bakah Saituala Samagra Shiksha DPO pisate a tlawh a; Hliappuiah khawtlang hruaitute nen an inkawm bawk.

Dr Vanlalthlana chuan, sorkarin mipui ráwn chung zelin zirnaah hmalak a tum thu sawiin, "Zirna-ina ṭan hun chungchangah pawh nu leh pate'n School Education website-ah an duh dan an thehlut thei. National level entrance exam hrang hrangah Mizoram chuan state dang kan tluk lo ṭhin a, zirlaite'n hriatthiamna nen lehkha an zir theih nan sorkar sikul zawng zawngte'n term exam-ah zawhna inang (common question) an chhang tawh dawn a ni," a ti.

Zirna kaihhnawihah danglamna siam turin syllabus leh zawhna kalphung siamṭhat a, zirtirtute'n a tam thei ang ber training an neih a ṭul thu sawiin Minister chuan, "Sikul hrang hranga zirtirtu indaih lohna tikiam turin zirtirtu sem rual kawngah theihtawp kan chhuah zel a, zirtirtu sawn chhuah chungchangah buaina a tam ṭhin avangin transfer & posting rules thar duan a ni ang," a ti. Education department hotute hmalakna zarah NE Khawdungseiah zirna-in ṭha tak an hawng thei chu lawmawm a tih thu a sawi bawk.

Education Minister hi School Education joint director R Lalnunthari, deputy director PC Lalngaizuala leh Saitual DEO Micky Lalenkawla ten an ṭawiawm a ni.