Biometric enrolment kalpui dan tur rel

Lawngtlai district bawrhsap Cheemala Siva Gopal Reddy kaihhruaiin District Committee on Refugee chuan tun hnai khan Lawngtlai district-a raltlante chhinchhiahna, biometric enrolment kalpui dan tur an ngaihtuah a; Myanmar leh Bangladesh ráltlân, Lawngtlai khawpui chhunga awmteah hmalak hmasak an rêl.

Bawrhsap chuan, Lawngtlai district chu Myanmar leh Bangladesh ramri nei a nih avang leh ram pahnihah tualchhung buaina a awm mek avangin ratlante buaipui danah fimkhur a ṭul thu a sawi a, "Khaw ṭhenkhatah chuan dâwl zawh loh khawp raltlan an awm mek a, raltlan ṭhenkhat chu an duh duha tei kualin, district dang dangah an kal ṭhin a, an dinhmun dik tak chiang taka chinchhiah a harsa ṭhin," a ti a; sorkar hmalaknate theihtawpa ṭawiawm turin VC, tlawmngai pawl leh mipui a sáwm.

Ṭhutkhawmah hian biometric enrolment kalpui dan tur sawiho a ni a; biometric enrolment chu a hma thei ang bera kalpui ni se, Lawngtlai khawpui chhunga raltlan camp leh mi in luaha awmteah tih hmasak an rêl.

Myanmar leh Bangladesh aṭanga raltlan Lawngtlai district-a awmte tan biometric enrollment tih vek tura a ni a; enrolment-ah an hming, pa hming, Mizorama luh ni, an luhna hmun, Myanmar identity card leh an hnathawh, finger print leh thlalakte lak a ni ang.