Siaha-ah media workshop buatsaih

Directorate of Information & Public Relations leh Mizoram Journalists' Association (MJA) bultumin Siaha IPRO leh MJA, Siaha District chuan June 27, 2025 khan Siahaa IPR conference hall-ah Media Workshop an buatsaih a, Mara Autonomous District Council chief executive member M Laikaw-a'n a hmanpui.

M Laikaw chuan, chanchinbumite chu hun rei tak ata mipui rawng lo bâwl tawh an nih thu sawiin, tunlai khawvel milin an thiamna leh theihnate tât hriam a, mipui mamawhna anga inher rem thiam zel turin chanchinbumite a fuih.

Chanchin thar thehdarhtute chu sorkar leh mipui inkara palai an nih thu sawiin CEM chuan, "Mipui rawngbawltu in nihna rilrua vawn reng a ṭul a, sorkar aṭanga mipui hriat tur pawimawhte palai hna thawktu an nih vangin in hlu hle a ni," a ti a; tu pawh sorkar se, ṭha taka thawhpui thiam tur te, àwn lam nei lo tur te, an thu tihchhuah turte mahni khua leh ram tichhe thei zawng a nih leh nih loh ngaihtuah ṭhin turin a chah.

M Laikaw chuan, MADC sorkarin New Maraland Vision a nei tih sawiin, chung zinga pawimawh tak pakhat chu 'good governance' (sorkar ṭha) a nih thu a sawi a, "Hemi hlawhtlinna tura pawimawh chu dikna leh felna nena rorel, dan chungnunna, eiruk awm lohna, sorkar hnathawk zawng zawng intluktlanna, inrelbawlna felfai taka kalpui leh ruihhlo dote a ni. New Maraland Vision tihlawhtling turin rilru leh ngaihtuahna thar neih a pawimawh," a ti.

Media Workshop-ah hian Lengzzem editor Vanneihtluanga buatsaih, ‘Traditional media and new media’ tih leh, Dr H Laldinmawia, PUC buatsaih, ‘Mizo ṭawng ziah dan dik’ tihte zirho a ni.