Lirthei chêtsual tamna hmun enfiah

Lunglei DC hnuaia din Joint Verification Team chuan June 27, 2025 khan National Highway-54 kawngpuia lirthei chetsual tamna hmun, Ṭawipui North-II daia mi an endik a; kawng siamtu contractor chu kawng nâl laite siamṭha nghal turin an hrilh.

Joint Verification Team hi Lunglei SDO (Sadar) TT Beikhaizi chuan a kaihruai a; PWD, IPR leh LA Branch official te, NH kawng enkawltu NHIDCL leh contractor BRN Infrastructure aiawh te, Ṭawipui North-II VC, YMA Lunglei Sub-Headquarters, Ṭawipui Group leh Ṭawipui North-II Branch aiawhte an tel.

Lirthei chesual tamna hmuna kawng luan (seal coating) nâl deuh lai, metre 200 vela thui chu BRN Infrastructurein a chung tithap turin hma la nghal se, an ti a; hna an thawh dan enpui turin Ṭawipui North-II YMA hruaitute an ruat. Kawng kual ulh lai tihziaawm nan laih belh a ṭul dawna a lan avangin thuneitu sang zawkah thlen ni se, an ti.

Ṭawipui North-II khaw daia lirthei chetsual ṭhinna hmunah hian June 3, 2025 khan Lunglei DC leh SP hmalaknain lirtheia chetsualna pumpelh a nih theih nan fimkhur tura inhriattirna (road signage) târ a ni.