Hlawhtlinna tawng baw turin mite aia thawhrim a ngai - Jeje Lalpekhlua

South Tuipui bialtu MLA Jeje Lalpekhlua chuan June 28, Inrinni khan Kawnpui Zone Football Association Tournament final a hmanpui a; hlawhtlinna tawng baw turin mite aia thawhrim a ṭul thu sawiin, infiammite chu zirna thlahthlam lo turin a chah.

Jeje Lalpekhlua chuan, hlawhtlinna tawng baw turin mite aia thawhrim a ṭul thu a sawi a, "Tunah chuan Mizorama khaw hrang hrangah khelmual ṭha tak tak a awm tawh a, chuvang chuan, ruih theih thil laka fihlim a, kan taimak a, mahni inthunun mi kan nih chuan hlawhtlinna hi kan ban phâkah a awm. Chumi thleng tur chuan kan nih tur min dâl theitu kan kalsan ngam a ngai," a ti.

Zirna leh football chu kal kawptir a pawimawh thu sawiin South Tuipui MLA chuan, "A theih hrâm chuan zirna thlahthlam lo ang che u. Amaherawhchu, naupangte tuina pawh kan hriat a pawimawh a, an thiamna (talent) hai chhuah kawngah ṭan kan lak a ngai," a ti a;l football leh infiamna chu mi tin tan eizawnna ni thei lo mah se, hriselna leh damdawi ṭha tak a nih thu a sawi.

Jeje Lalpekhlua chuan, Bána Kaih scheme-a Empowerment Mizoram Sports chungchang sawiin, "Naupangte'n infiamna lama hlawhtlinna an neih theih nan kawng hrang hranga ṭanpuina a keng tel a, thingtlang khawi hmunah pawh coach rawih theihna thlengin ruahman a ni," a ti.