Chawhmeh zuarte bungrua mansak; An zawrh dan ngaiin an inzuar leh

Aizawl Municipal Corporation (AMC)-in Aizawl Tennis Court leh a chhehvel kawngpui dungah chawhmeh zawrh phal loin, chawhmeh zawrh tumtute bungrua an mansak a, mahse, chawhmeh zuarte hi June 28, Inrinni khan kawng dungah an inzuar tho.

Chawhmeh zuarte sawi danin, AMC-in police punin June 27, 2025 zanah chawhmeh zuarte'n an chawhmeh zawrh tur an lak khawm, kawng dunga an dahte chu an man a, AMC Multi Complex Building, Tuikual South-ah an dah. Chawhmehte chu a neitute'n AMC Multi Complex aṭanga la chhuak lehin, Inrinni khan kawng dungah an zuar a ni.

Inrinni zingah khan thuneitute chuan chawhmehte chu chhuhsak leh an tum a, chawhmeh zuarte'n an remti lo. Hun eng emaw chen an inep a, traffic pawh a jam phah hman a; zing dar 9 vel aṭangin an inzawrh dan pangngaiin an inzuar leh thei a ni.

Chawhmeh zuarte chuan, Inrinnia an thil zawrh tur buaipuiin kar tluanin hun an hmang a, chaw pawh ei mumal hman loin Inrinnia inzuar turin theihtawp an chhuah ṭhin thu an sawi a, "Thla tin hlawh nei kan ni lo a, kan fate châwmna atan theihtawp kan chhuah tak meuh a ni. Kan inzawrh theih loh ai chuan kan ṭang tlat dawn," an ti.

Tarlan tawh angin, June 21, Inrinni pawh khan AMC lam chuan police punin, chawhmeh zuarte chu an bungrua an lo khawmsak tawh a; chawhmeh zuarte chu lungawi loin kawngpui an dang a, tlai lamah dan pangngaiin an chawhmeh an zuar leh a ni.

Hetih lai hian, AMC chu a dinna ngaiah la dingin, Aizawl Tennis Court leh a chhehvelah thil zawrh a khap zui zel. July 1, 2025 (Thawhlehni) hian UDPA Minister, Aizawl Mayor leh mi pawimawh dangte nen thil zawrh khap chungchang an sawiho dawn nia thu dawn a ni.