KHAWTHLIR

Remna Ni

Vawiin hi MNF leh India sorkarin inremna an ziah champha, 'Remna Ni' a ni. Remna Ni hi MZP bultumin Lammualah lawm a ni dawn a, chief minister Lalduhoma'n a hmanpui ang. Mizoram sorkar chuan Remna Ni hi sorkar chawlhah a puang a ni.

MLA-in enfiah

Minister of state B Lalchhanzova chuan July 28, Inrinni zing khan a bial Aizawl East-II chhung Dawrpui Jail Venga police quarters septic tank siam mek a tlawh a, hna thawh dan a enfiah. Police quarters-a chengte septic tank fel lo vang hian kum eng emaw chen aṭang khan a bul vela chengte tana rimchhia leh harsatna a thlen avangin B Lalchhanzova ngenna angin PWD-in a siamṭhat hna an thawk mek a ni.

Lirthei tlân khap

Bawngkawn-ITI Veng inkar kawng, Unionthanga leh C Hrangluta te in inkarah tui luankawr siam hna thawh mek a nih avangin Ramhlun South-a College Road-ah lirthei lian (HMV) tlan khap a ni. Khapna hian July 15, 2025 thleng a huam.

Ruihhlo inzirtir

Saituala Excise & Narcotics department, One Stop Centre leh YMA Sub-Headquaters hnuaia Kumpuan Committee chuan June 27, 2025 khan District Higher Secondary School, Keifangah ruihhlo hman sual chungchang inzirtirna, 'Drug Awareness Campaign' an buatsaih. END officer-in-charge R Lalruatliana'n a kaihruai a; zirlaite chu ruihhlo laka fihlim tur leh ṭhian thlanah fimkhur tura chah an ni.

Career awareness

Lunglei Officers' Club leh Lunglei District Hub for Empowerment of Women chuan June 27, 2025 khan Baptist Higher Secondary School-ah zirlaite hma lam hun atana kaihhruaina leh kawng kawhhmuhna, Career Awareness an buatsaih. District bawrhsap Navneet Mann-i'n a hmanpui a; zirlaite chu hma hun ngaihtuah luat vanga buai lo tura a chah rualin, mahni hma hun tur thlir lâwk erawh a finthlak thu a sawi.