Aizawla YMA-te fainaah an inel dawn; 'YMA-in faina a buaipui hi a inhmeh' - UDPA Minister

Urban Development & Poverty Alleviation depatment, Aizawl Smart City Ltd., Aizawl Municipal Corporation leh Central YMA te bultumin Aizawl khawpui chhunga YMA branch-te chu faina lamah an inel dawn. Fai inelna atana pawimawhte inhrilhfiahna hun June 27, 2025 (Zirtawpni) zan kha CYMA Hall-ah buatsaih a ni a, UDPA minister K Sapdanga'n a hmanpui.

K Sapdanga chua, YMA-in faina a buaipui chu inhmeh a tih thu sawiin, "YMA-in faina kawngah tha kan thawh ang a, sorkarin sum a tum ang. Veng fai inelna aṭang hian Aizawl khawpui chhung kan tifai thei ang," a ti a; Aizawla YMA branch-te chauh ni lo, Mizoram khaw tina YMA branch-te leh tlawmngai pawl dangte chu fainaah Mizoram mipui kaihruaitu ni turin a sâwm.

Inhrilhfiahna inkhawmah hian Aizawla YMA branch 85 aṭangin hruaitu pahnih ṭheuh an tel a; UDPA Minister-in UDPA department-in veng tina dah tur bawlhhlawh báwm pahnih ṭheuh an ruahman chu a sem nghal.

Faina inelnain a tum chu - Aizawl khawpui Garbage Free City (bawlhhlawh awm lohna khawpui)-a siam a ni a; veng tina bawlhhlawh thliar hran ṭhat dan inzirtir, vantlang inthiara leh zun-in vawn fai inzirtir, vantlang hmun lûn lai vawn fai, bawlhhlawh sâwngbâwl ṭhat leh faina leh thianghlimna kawnga mipui inzirtir leh thawhhona ṭha zawk neihte a ni bawk.

Veng fai endik thawh khatna chu September aṭanga December, 2025 chhunga neih tum niin, endik thawh hnihna January-March 2026 chhungin neih tum a ni a; Chanchar Kût 2026 lawmnaah result puan leh lawmman sem tum a ni.

Veng fai berin Rs 3,00,000, pahnihnain Rs 2,00,000 leh pathumain Rs 1,00 000 an dawng dawn a; hmasawn zual veng/branch pualin lawmman siam tum a ni bawk.

Endiktu atan mi pathum ruat an ni a, chungte chu Save the Riparians aṭangin Romalsawma, MJA general secretary K Zothanpara leh Mizoram University-a research scholar Gospel Lallawmzuali te an ni.