MZU under graduate result a chhuak: Graduate thar mi 3,981 an awm

Mizoram University chuan nimin khan under graduate even semester result a tichhuak a, graduate thar 3,981 an awm. Graduate thar zingah Pachhunga University College (PUC)-a B.Sc. Biotechnology zirlai Yerrabelli Dedeepya chuan a ti ṭha ber.

MZU under graduate result chhuakah hian sixth semester (final year) bikah zirlai exam 5,285 zinga 3,981 an hlawhtling a, pass pencentage chu 75.33% a ni. Arts-ah zirlai exam 4,482 zinga 3,354 (74.83%) an pass a, Science-ah exam mi 504 zinga 356 (70.63%) an hlawhtling. Commerce-ah zirlai exam 287 zinga 262 (91.29%) leh Home Science-ah zirlai 12 zinga pakua (75%) an pass bawk.

Graduate thar zinga gold medalist (stream tina ti ṭha ber)-te chu BA-ah Lalremsiama, PUC, Political Science (Cumulative Grade Point Average - CGPA 9.260) a ni a; B.Sc.-ah Yerrabelli Dedeepya, PUC, Biotechnology (CGPA 9.810) a ni.

B.Com.-ah R Lalngaihawmi, Higher and Technical Institute of Mizoram (HATIM), Lunglei (CGPA 9.050) a ni a; B.Sc. (Home Science)-ah Mary Lalawmpuii, Zirtiri Residential Science College (CGPA 8.520) a ni. Gold medalist zingah hian Yerrabelli Dedeepya chuan a hmu sang ber.

MZU-in under graduate result a tihchhuah taka Arts, Science, Commerce leh Home Science-a semester II, IV leh VI-a exam zawng zawng chu mi 7,329 an ni a, mi 5,552 hlawhtlingin, pass percentage chu 75.75 a ni. Semester VI-te chu regular leh repeater an ni a, semester II leh IV-te erawh repeater chauh an ni thung.

MZU under graduate result chhuakah hian BA-ah semester-II repeater mi 601 exam in, mi 468 (77.87%) an hlawhtling a; semester-IV repeater mi 1,133 exam in, mi 894 (78.91%) an pass a; semester-VI regular leh repeater mi 4,482 exam in, mi 3,354 (74.83%) an hlawhtling.

B.Sc.-ah semester-II repeater mi 73 zinga 36 (49.32) leh semester-VI repeater mi 160 zinga 100 (62.50%) an hlawhtling a; semester-VI regular leh repeater mi 504 zinga 356 (70.63%) an pass.

B.Com.-ah semester-II repeater pangate an pass vek a, semester-VI repeater 66 zinga 65 (98.48%) an hlawhtling. Semester-VI regular leh repeater zirlai 287 zinga 262 hlawhtlingin, pass percentage chu 91.29 a ni.

B.Sc. Home Science-ah semester-II repeater pahnihte an pass ve ve a, semester-VI repeater pali zinga pakhat (25%) an pass. Semester-VI repeater leh regular student mi 12 exam in, mi pakua (75%) an hlawhtling.

CGPA 8 chin chung lam (8-10) distinction, CGPA 6 leh 8 inkar (8 tling lo) first division, CGPA 5-6 (6 tling lo) second division, CGPA 4-5 (5 tling lo) pass a ni a; CGPA 4 hmu tling lote chu fail an ni.