Aizawl-Imphal flight titawp lo turin ngen

All Mizo Medical Students' Union (AMMSU) general headquarters, Regional Institute of Medical Sciences (RIMS) Imphal, Manipur chuan, Air India-in Aizawl leh Imphal inkara thlawhtheihna an tihtawp chu ṭha an tih loh avangin, thuthlukna ennawn leh turin sorkar laipuia Civil Aviation Minister an ngen.

AMMSU chuan, Mizo zirlai tam tak Manipur hmun hrang hrangah lehkha zira an awm thu leh Manipur zirlai tam tak Mizorama zir an awm thu sawiin, "Mizorama damlo ṭhenkhat chu Manipur-ah refer ṭhin an ni a, Mizoram sorkar hnathawk tam tak Manipur-a post mek an awm a, Manipur mi tam tak Mizorama post an awm bawk," an ti a; hengte avang hian Mizoram leh Manipur chu rang taka an kàrtawn a ngaih fo thu an tarlang.

AMMSU chua, Mizoram leh Manipur thlun zawmtu kawngpui awm chhun chu an chhiat em vang leh hun a duh rei ṭhin avangin, mi tam zawk chuan thlawhnaa kal an duh zawk ṭhin tih an sawi a, "Mamawhna a sàn em em laia Air India-in Imphal-Aizawl flight tihtawp a tum ta mai hi kan hrethiam lo a, thuthluknate ennawn leh a, flight pawh a kal dan ngaia kaltir leh ngei turin kan ngen a ni," an ti.An dilna ngaihthlaksak an nih loh chuan lungawi lohna lantir an tum thu an sawi bawk.