Police pahnih kutthlakah Home Minister-in mawh a phurh: MPCC
Congress party chuan thuchhuah siamin, April 18, 2020-a Tripura ramria 5th IR police duty pahnihte Chakma-te'n kut an thlâk chu pawi an tih thu an tarlang. Thil thleng chu Covid-19 do kawnga Mizoram sorkar ruahmanna fel tâwk loh vangah an ngai a, Home minister Lalchamliana'n mawh a phur lian hlea an ngaih thu an sawi.
MPCC chuan, Mizoram sorkarin Covid-19 laka invênna atana lockdown a kalpui danah police leh magistrate-te'n dan leh thupek kengkawh loin, local task force a rin zawk avangin police-te hlutna nasa taka a tlahniama an ngaih thu an sawi a, "Task force-te kianga duty police-te'n tih tur an nei mumal lo a, hei vang hian police-te'n zah an hlawh tâwk lo a, kut hial an tawrh phah taah kan ngai," an ti.
West Phaileng Police Station-a FIR thehluh a nih laia Tripura police-te'n pawi khawihtu nia hriatte an man leh Kanchanpur Chief Judicial Magistrate-in bail-a a chhuah chu pawi an tih thu sawiin MPCC chuan, "Pawi khawihtute hi an pawi khawihna Mizoram ngeia an chungthu ngaihtuah a nih theih nana chak taka hma la turin Home Minister kan phût," an ti a; kutthlaktute chu mi eng emaw zat nia sawi a nih avangin, pawi khawihtu dangte man an nih thuai theih nan chak taka hma la nghal turin Home Minister an phût a ni.
Congress party chuan, public relation lamah Home Minister a chak loh avangin Mizoram police-te hnathawh mipuiin an hre tâwk lo nia sawiin, "Covid-19 donaah engmah ti ve lo ang maia mipuiin police kan ngai hman hial kha a pawi hle. Police officer ṭhenkhatin Mizoram police hnathawhte social media lama tlawmngaia an puanzar hial ngai khawpa Home Minister ber a awm hi a ṭha lo kan ti hle," an ti.
MPCC chuan, Home minister Lalchamliana chu Disaster Management & Rehabilitation department enkawltu minister a nih bawk avangin Covid-19 donaah a phusa berte zinga mi a ni turah an ngai tih an sawi a; chutih laiin, DMR Minister a ni tih hriat mang loh khawpin a awm thei nia sawiin, hun khirh laia ram hruai hna thawk tlak loa an ngaih thu an sawi bawk.