New Serchhip South LTF an inhnukdawk
New Serchhip South Local Task Force-te chuan Covid-19 laka mipui himna tura an hmalaknain awmzia a nei lo nia an hriat avang leh, thuneitute lam aṭanga thlawpna an hmu lo nia an hriat avangin nimin tlai dar 5 khan an hmalakna zawng zawng an titawp.
New Serchhip South LTF hian nimin khan Serchhip DC hnenah an lungawi lohna thu hi lehkhaa ziaka thehlutin, district thuneitute an hmu nghal a ni.
An lehkhaah chuan an huam chhunga in sa mek pakhat chuan inkharkhip kalpui ṭan a nih aṭang khan a in sak a chhunzawm char char tih tarlangin, "Inkharkhip vawi hnihna kalpui a nihah pawh in sa turin DC aṭanga phalna lak hmasak tur tih a ni chungin DC aṭanga phalna a neih hma pawhin in sak a chhunzawm a, phalna a neih hnu pawhin mi 5 aia tam lo chhawr tur a nih laiin dan kalhin mi 20 chuang a chhawr a ni," an ti a, magistrate-te hnena hemi chungchang an thlen pawhin dan anga hmalakna an hmu lo tih an tarlang.
District thuneitute an hmuh hnuah New Serchhip South LTF chu ṭhukhawmin, chhanna an hmuh leh an hmalak tum dan ṭha an tih loh avangin, hmalak chhunzawm tawh loh an rel a ni.
New Serchhip South LTF hian duty point pahnih - IOC Veng leh New Serchhip Venglaiah an nei a, inkharkhip chhung hian chhungkaw 100 hnenah
ṭanpuina an sem chhuak tawh a ni.