Mamit MLA-in Zomuantlang a tlawh

Mamit bialtu MLA H Lalzirliana chuan nimin khan Mamit district-a Zomuantlang khua a tlawh a, 5th IR police constable pahnih kutthlak rawn an nih chungchang Zomuantlang khaw­tlang hruaitute leh force hotute a sawipui. Zomuantlang khaw tan Covid-19 dona hmanruate leh ei leh in turte a pe a ni.

H Lalzirliana chuan, thil thleng chu pawi a tih thu sawiin, "Khawvelah hripui hlauhawm tak a léng mek a, mi tin kan buai em em laia suahsual rawng báwl páwl an awm hi a pawi hle. Boruak rit tak kan hmachhawn mek laia hnam ang zawng emaw, chi leh chi ang emawa lo buai hi a hun lo," a ti a; hnam inpumkhatna tichhe zawnga buaina chawk chhuak an awm chuan an demawm hle tur thu a sawi.

Mizoram khawthlang lama awmte chu hnam hrang hrang awm khawm, Mahatma Gandhi-a'n 'Pangpar huan mawi tak' tia a sawite zínga mi an nih thu sawiin H Lalzirliana chuan, "Inlung­rual leh inngeih tlang taka khawsa ho tur leh tawrh a ṭul huna tuar tlang a, ṭan rual a huna ṭang rual tur kan ni," a ti. Social media hmanga thu belhchian dâwl lo vawrh darh awm ṭhin chu pawi a tih thu leh ram leh hnam inpumkhatna tichhe zawnga thu sawi lo tura fimkhur a ṭul thu a sawi bawk.

H Lalzirliana hian a bial chhunga khaw ṭhenkhat a tlawh nghal a, khaw­tlang dinhmun leh harsatna an neihte khawtlang hruaitute a sawipui. Task force-te chu ṭanpuina pawisa leh mipui hnêna sem tur mamawh hrang hrangte a hlân.

Tuipuibari leh Andermanik khuaa thlipuiin in a tihchhiat neitu chhungkaw 10 hnenah chhawmdawlna pawisa leh silpauline a pe a, Rajiv Nagar khuaa Rohmingthangi Memorial Mission compound leh school tlawhin, ṭanpuina a pe a, New Kawnpuia 5th IR police duty-te hnenah Rs. 5,000 a pe bawk a ni.