Bungraw phurh phalna apps mPASS hman dan sawiho

Chief secretary Lalnunmawia Chuaungo hoin April 22, Nilaini khan Secretariat conference hall-ah sorkar mi pawimawhte bakah, Mizoram Truck Owners & Drivers Association, Mizoram Oil Tanker Driver Association leh Mizoram Tipper Driver Association hruaitute an ṭhukhawm a; mipui ni tin mamawh ni lo bungraw dang Mizorama phurh luh phalna (inter state movement permit) online-a dil theihna 'mPASS' hman dan an sawiho.

Lalnunmawia Chuaungo chuan, fimkhur thei ang bera bungraw phurh luh a pawimawh thu sawiin, "Mizorama chêngte aṭang chuan Covid-19 a darh a rinawm loh a, bungraw phur luttute'n hmun dang aṭangin hripui hi kaiin, Mizoramah an pu lut thei tih hriain fimkhur thei ang bera kalpui a ngai," a ti a; fimkhur taka thil kalpui a nih theih nan Information and Communcation Technology (ICT) department-in mPASS a siam chu ṭangkai taka hman a nih a beisei thu a sawi.

mPASS hi ICT department chuan 'mCOVID-19 mobile application'-ah an telh belh tawh a, registration, permission, declaration leh entry point scan tihnate a awm.

mCOVID-19 hi android system hmangte tan Playstore aṭangin a download theih a, iOS (Apple phone) system hmangte chuan mcovid-19.mizoram.gov.in ah lutin apps an hmang thei. mPASS hman dan leh inter state movement permit dil dan video chu MSeGS Ict youtube channel-ah en theih a ni bawk.

Inkhàrkhip kalpui meka revised guidelines ang chuan, state páwn aṭanga bungraw lâk luh theih zingah ni tin mamawhte chu phalna (permit/pass) lak ngai loa lak luh theih a ni a, Vairengte SDO(C) emaw, Bairabi SDC emaw hnenah declaration (prescribed form hmangin) an thehluh a ngai thung.

Mipui ni tin mamawh ni lo, ei leh bar zawnna leh hmasawnna atana mamawh bungrua - steel, cement, brick, balu, in sakna bungrua la lut turte erawh chuan dilna form siam sa hmangin Home department-ah permit an dil hmasak a ngai. Permit hi mPASS hmangin online-a dil theih a ni tawh a; Mizorama thil siam, ran vulh leh thlai/thei thar chhuahte chu Mizoram chhung hmun hrang hrangah bungraw chêt ṭanna district-a DC-te phalnain thawn chhuah theih a ni.

#Registration: Ni tin mamawh bungrua tana duan a ni a, phalna (permit) dilna a ni lo. Registration tihfel hnuah mPASS ID a lang ang a, SMS pawhin ID an dawng bawk ang.

#Permission: State páwn aṭanga non-essential commodity Mizorama phurh luh phalna - inter state movement permit online-a dil theihna a ni a, chanchin kimchang fill-up in dilna thehluh tur a ni. Dilna chu thuneitute'n an enfiah hnuah phalna chu SMS-in a diltute an thawn ang a, mPASS ID a tel nghal ang.

#Declaration: Bungraw phurh chanchin kimchang thehluhna a ni a, non-essential commodity phurh luh dilnaa information kim lote an chhu lut ṭha leh thei. Permission dil laia driver/handyman/motor leh a dang fill-up lohte chu hriat theih veleh Mizoram an luh hmain mPASS Declaration aṭangin an thehlut ngei tur a ni. Non-essential commodity phurtute'n Declaration hi an tih ngei a ngai.

#Entry point scan: Checkgate-a medical duty-te hman tura siam a ni a, medical screening an tih zawhah bungraw phurtute mPASS ID chu portal-ah an chhinchhiah (thun lut) ang.