Treasury-ah bill lut a tlem

Mizoram sorkar Treasury hrang hrangah tunlai hian contract leh supply bill a lut meuh lo. Treasury-a pawisa dilna lut tam ber chu sorkar hnathawk hlawh tur, DA leh medical reimbursement-te a ni.

Vanglaini thu dawn danin, Treasury-te chu Covid-19 vanga inkhârkhip puan a nih hnuah pawh an kalphung pangngaiin an kal deuh reng a; sorkar hnathawkte March hlawh an pe chhuak deuh vek tawh a, tunlai hian April thla hlawh tur an buaipui leh mek.

Mizorama Treasury lian ber Aizawl South Treasury-in tun dinhmuna ni khata sum an pek chhuah theih zat (ceiling) chu cheng nuai 130 a ni a, Finance department aṭanga thil ṭul zuala ceiling aia tam pe chhuak tura tih a awm chuan pek chhuah a ni tho bawk.

Tunlai hian contract leh supply bill Treasury-a lut a awm meuh lo a, a chhan an hriat loh thu thawktute chuan Vanglaini palai an hrilh.