Inkhârkhip karah ṭanpuina an sem

Covid-19 léng vanga hun rei tak inkhârkhip a nih tawh avangin Mizorama khua leh veng eng emaw zat chu khua/veng dangte ṭanpuiin an che chhuak mek zel a; pawl dang eng emaw zat an che mek zel bawk.

Nimin khan Aizawla Electric Veng, Republic Veng leh Ṭhuampui khawtlangte chu thingtlang lam, a bikin ramri hnaiha awm khuate hnenah ṭanpuina semin an chhuak a; Calcutta Mizo Welfare Association-in mi ṭha­hnemngaite sum thawh khawm hmangin nimin khan Kolkata-a Mizo tangkhang eng emaw zat hnenah chhawmdawlna an hlân.

Electric Veng khawtlang chu Kolasib leh Mamit district-a ramri dep khaw hrang hranga mite hnenah ṭanpuina pe turin an chhuak a; an Branch YMA leh veng mipui thawh khawm Rs. 9,00,000 hmanga an lei buhfai quintal 33, alu ip 15, sailuah ip 16, purûn sen ip 4, tél bawm 16, nghathu kg. 10, thingpuifê báwm 20, silpauline 80, mombati tlâwn 630, thosi hlo 100, hmai tuam­­na 500, torchlight 76 leh pawisa fai 3,80,000 an sem a ni.

Ṭanpuina an pekte chu - Kolasib district-ah - Saipum, Saiphai, Saihapui-V, Phainuam, Buhchangphai, Phaisen, Bûkvannei, Saihapui-K, Bairabi North, Bairabi South, Mamit district-ah - Saikhawthlir, Chuhvel, Kolalian, Hriphaw, Suar­hliap, Zawlpui, Luimawi leh Bungṭhuam te a ni.

Republic Veng Task Force chuan Mizoram leh Manipur inrina chhehvel khuaa duty-te tan alu, buhfai leh dailuah ṭhahnem tak an sem a; a ṭul anga sem zel an tum bawk.

Thu dawn danin, Ṭhuampui Branch YMA pawh Rs. 2,00,000 hû thil chi hrang hrang kengin Mizoram khawchhak leh khawthlang lam ramri depa duty-te ṭanpui turin nimin khan an chhuak a, Mizoram khawthlang lamah Rs. 1,00,000 hû an sem bawk a ni.

Ṭawizo khua chuan an thlai thar ṭhahnem tak chu Armed Veng local task force hnenah an hlân a; Armed Veng task force chuan thlaite chu a thlawna an dawn a nih angin, veng mipui hnenah a thlâwnin an sem. Armed Veng hian Ṭawizo khaw hnenah buhfai ip 10, dailuah leh alu ip thum ve ve an pe ve bawk.