Inkhârkhip vangin Lokayukta-in Thubuai an chhui chak thei lo

Eiruk thubuai chhuitu Lokayukta chuan Covid-19 laka invèn nan inkharkhip puan a nih avangin thubuai an chhui chak thei lo. Hetih lai hian, inkharkhip hnuah thubuai pakhat an dawng.

Vanglaini zawhna chhangin Lokayukta chairman C Lalsawta chuan, inkharkhip puan ni mah se pisa an kal leh tawh thu a sawi a, "Office-a tih theih ang ang chu kan bawhzui zel a, páwna chhuaka va tih ngai ang chi erawh a rem rih lo. A theih ang angin thubuai kan dawnte kan bawhzui ve zel a ni," a ti.

C Lalsawta sawi danin, inkharkhip puan a nih hnuah thubuai pakhat an dawng tawh a, chhui zui zel tlak a nih dawn leh dawn loh zir chian mek a ni.

Lokayukta-a thubuai lutte chu zir chian a nih hnuah chhui zui zel tlaka an ngaihte chu anmahniin a chhuitu tur an neih loh avangin Anti Corruption Bureau (ACB)-ah chhui zui turin an thawn ṭhin a, ni 45 chhungin preliminary inquiry zawh tura tih a ni.

Lokayukta hian thubuai an dawn zinga pahnih chu an titawp tawh a, pakhat chu finfiahna thar awm chuang loa kum 10 hnua mi thehluh leh a nih vang niin, pakhat chu Assembly-a thehluh, PAC-te'n an en zui tur a nih vang a ni.