International Yoga Day hman a ni

June 21, Inrinni kha International Day of Yoga vawi 11-na a ni a; Aizawlah chuan Governor Gen. Dr Vijay Kumar Singh hoin Rajiv Gandhi Stadium, Mualpuiah hman a ni. Kumin Yoga Day thupui chu 'Yoga for one earth, one health' tih a ni.

Governor chuan, yoga pual liau liaua ni bik 'International Day of Yoga' kum tina hman a ni chu India ram tana chhuanawm leh chhinchhiah tlak a nih thu a sawi a, "Yoga hi taksa, rilru leh ngaihtuahnate ṭha taka thlunzawm a, hriselna ṭha thlentu a ni a, yoga exercise hrang hrangte chuan taksa leh rilru hrisel nan tinzawn leh hnathawh dan bik an nei hrang ṭheuh a ni," a ti a; yoga ngainatute chu AYUSH hotute leh mithiamte aṭanga inzir hmasa ṭhin turin a chah.

Aizawla Yoga Day hmanna hi National AYUSH Mission, Directorate of AYUSH bultuma neih a ni a, mi 700 vel an tel.

Ministry of AYUSH chuan International Day of Yoga 2025 hman dan tur signature event 10 a duang a, chung zinga pahnih - Yoga Sangam leh Harit Yoga-te chu Mizoramah kalpui a ni a; Directorate of AYUSH-in a duh apiang tan ramhmul (damdawi) thing ṭiak an sem.

International Yoga Day pual hian Mizoram hmun hrang hrangah hun hman a ni a; Harit Yoga 'Ek Ped Maa Ke Naam' pualin thing phun hnatlang neih nghal a ni bawk.

India rama International Day of Yoga hmanna pui ber, Vishakapatnam, Andra Pradesh-a Prime Minister thusawi ngaihthlaka thlirho a ni a; common yoga protocol hmangin kalkhawmte'n a huhoin yoga instructor-te kaihhruaina hnuaiah yoga exercise chi hrang hrang an ti a ni.