KHAWTHLIR

MPF seminar

Mizoram People Forum (MPF), Mamit district chuan tun hnai khan Mamit Chhimveng YMA Hall-ah kohhran, MUP, MHIP, YMA, political party hrang hrang aiawhte leh sorkar department hotute pualin 'Seminar on Good Governance' an buatsaih. Zirhona hi MPF general secretary Rev. Lalramliana Pachuau-in a hmanpui a; MPF Gen.Hqrs. Governing Board member Rev. K Lalrinmawia'n good governance chungchang a sawifiah.

Hriselna endiksak

Lunglei district-a vohbik, persons with disability (PwD)-te chawikanna tura ruahman, Project LEAP (Lunglei’s Empowerment for Access and Equity for all Persons) hnuaiah tun hnai khan Ṭawipui South PHC-ah vohbik mi 42-te hriselna dinhmun endik a ni a, Unique Disability Identity (UDID) card siamsak turin UDID portal-ah thun nghal an ni. Vohbikte hi an veivahna senso tumsak an ni.

Heroin man

Assam Rifles leh Excise & Narcotics department ṭang dun chuan June 21, Inrinni khan Champhai Zotlang huam chhungah hmeichhe pahnih hnen aṭangin heroin gram 161.200 an man. Hmeichhe pahnih lakah hian Excise & Narcotics dept. chuan thubuai an ziak lut a ni.

Chetsualnaah thi

June 21, Inrinni zan dar 11:30 vel khan Kawnpui lam aṭanga Aizawl lam pana tlan tank lorry pakhat Lungdai khaw daiah chesualin, kawng thlangah a tlan liam. Tanker handyman Ebenezer Halleluia (22), Saiphai chu chetsualna hmunah a thi a, lirthei khalhtu pawh hliamin, Civil Hospital, Aizawlah enkawl a ni. Lungdai khawtlang chuan ruang leh hliam tuar lak chhuah hna an thawk. Tank lorry hian Lungleia dah tur petrol a phur a, a leak avangin Lungdai khawtlang leh tank lorry neitute'n a theih ang angin an la chhuak a ni. Ebenezer-a ruang hi nimin khan an khua panpui niin, tlaiah an vui nghal.