KHAWTHLIR

Nimin khan Champhai District Hospital-ah Champhai Venglai Branch YMA chuan thisen unit 31 an pe a, petute mipa 22 leh hmeichhia pakua an ni. Nilaini khan Champhai Bethel Branch YMA-in thisen unit 4 an pe bawk. Kolasib Venglai Branch YMA Chawngbawla Section-in unit 14 pein, petute mipa 11 leh hmeichhia pathum an ni a; Mission Veng FC-in Aizawl Civil Hospital-ah unit 12 an pe. Lunglei Ramthar Veng CO bial chuan Nilaini leh nimin khan Lunglei Civil Hospital-ah thisen unit 21 an pe a, petute mipa 19 leh hmeichhia pahnih an ni.

Helen Lowry Higher Secondary School NSS unit chuan nimin khan Gan Sabra Orphanage Home an tlawh a, buhfai, alu leh artui ṭhahnem tak an pe.

Mizoram Jour­nalists Welfare Society Governing Board chu nimin khan an chairman Sangdingliana, Information & Public Relation (IPR) secretary hoin IPR Director pisaah an ṭhu a; district hrang hrang aṭanga Mizoram Journalist Welfare Scheme (MJWS) hnuaia ṭanpui dilna lutte thlirhoin, mi pahnih hnenah ex-gratia leh mi 19 hnenah damdawia inenkawlna senso ṭanpuina tur an tifel.

Champhai District Hospital-a doctor-te leh Champhaia chanchinbumite chu nimin khan Medical Superintendent seminar room-ah an inkâwm a; medical superintendent Dr Zatluanga'n kaihruaiin, Covid-19 chungchang an sawiho.

Kolasib District Magistrate chuan district páwn lam aṭangin Kolasib district chhungah Animal Husbandary & Veterinary Director phalna tel loa vawk lak luh khap a nih thu a puang. Vawk thi reng reng, lei thûk taka laiin phûm zel tur a nih thu a tarlang bawk. Thupek hi thla hnih chhung hman a ni ang.

Hnahthial SP Lalbiakkila leh medical officer Dr Lalrengpuii Ralte te hoin Hnahthial District Task Force member-te chuan nimin khan Hnahthial veng hrang hranga task force duty post an tlawh kual a; hmai tuamna, kutkawr, damdawi (nachhawkna) leh ORS an pe. Hnahthialah hian veng hrang hrang pariatah duty post 26 a awm a ni.