Remna Ni lawmnaa tel turin mipui sâwm

Mizo Zirlai Pawl (MZP) Gen. Hqrs chuan June 30, 2025 khian Lammualah Mizoramin remna leh muanna a neih champha vawi 39-na 'Remna Ni' an lawm dawn a, tel vek turin Mizo mipui an sáwm.

MZP hruaitute chuan June 21, Inrinni khan an pisaah thuthar thehdarhtute kâwmin, Remna Ni lawmna an buatsaih tur chungchang an sawi.

MZP president H Lalthianghlima chuan, "Remna kan neih hi kum 39 lai ral tawh mah se, a hlutna a la ngai reng a, kum 20 tehmeuh hrehawm leh harsa taka kan awm hnuah Mizo mipui ṭawngṭai chhuah a nih avangin theih ang tâwka lawm hi a phu. Zirlaite phei chu a hlutzia leh Mizote hun pawimawh a nih zia kan inhrilh thar zel a ṭul a ni," a ti.

Remna Ni lawmna chu sorkar puihnain MZP-in an buatsaih dawn thu leh chief minister Lalduhoma khuallian a nih dawn thu sawiin MZP President chuan, "Mizo mipui, sorkar mi pawimawh, NGO hrang hrang, kohhran, zirna-in leh politicial party tinte he hun hmang tur hian kan sawm a ni. Remna Ni hi Mizo mipuite'n lungrual taka lawmho tur ni mah se, a bik takin political party-te ngaihdan a inang lo fo a, Remna Ni-ah kan inhnial nasa ṭhin a, hun pawh kan hmangho hlei thei lo a ni ber," a ti a; hei vang hian kum 2018 aṭangin MZP chuan kum tin Remna Ni an lawm ṭhin thu a sawi.

MZP hian Remna Ni lawmnaah hian remna atana thawh hlâwkte hnenah chawimawina a hlan ṭhin a, kuminah erawh chawimawina hi an sem dawn lo a ni.