In hmun/lo/ram teh man bituk aia tam pe/dilte thuneitute hnenah hriattir theih

Land Revenue & Settlement (LRS) department chuan thuchhuah siamin, sorkarin empanelled survey firm a rawihte hmanga in hmun/lo/ram teh chungchangah, sorkarin ram teh man (rate) a bituk aia tam pe leh dil an awm chuan phone number 8415806438-ah phone call leh whatsapp hmanga hriattir turin mipui a chah.

LRS director R Lalṭhazuala chuan, mimal leh pawl hrang hrangin e-ram online kaltlanga in hmun/lo/ram teh dilna an thehluhte chu sorkarin empanelled survey firm a rawihte hmangin teh mek zel a nih thu a tarlang a, "Sorkarin rate a bituk zat aia tam pe leh dil kan awm chuan phone number 8415806438-ah phone call emaw, whatsapp emaw hmanga hriattir tur a ni," a ti a; sorkar rate bitukah hian site plan drawing siam man a tel nghal thu a tarlang.