Complaint-te ṭha taka dawnsawn leh hmalak nghal zel kan tum - Power dept.

Power & Electricity department hotute chuan, electric bill chungchanga complaint lutte ṭha taka dawnsawn leh hmalak nghal zel an tum thu an sawi a; PE department chu corporation-a let turin strategic business unit (SBU) pathum - Generation SBU, Transmission SBU leh Distribution SBU-ahte ṭhen phawt tura hmalak a nih thu an sawi bawk.

Tun hnai khan PE department officer-te leh Mizoram Consumer Union (MCU) Headquarters hruaitute chu PE engineer-in-chief JH Malsawma pisaah an inkâwm a, tunlaia electric bill siam dan (billing software) thar chungchang sawiho a ni.

PE department hotute chuan, an hmanruate chu khawl thil a nih avangin thil fel lo eng emaw awm thei a nih thu an sawi a, "Eng emaw thil fel lo a awm a nih pawhin department chuan consumer-te complaint ṭha taka lo dawngsawng a, hmalak nghal zel kan tum a, tuna kan billing application thar PEDM Consumer App-ah hian mahni in aṭangin complaint mai theih a ni," an ti a; app kaltlangin mipui harsatnate sutkian theih a nih thu an sawi.

Corporation-a Power & Electricity department leh dan tur chungchang pawh sawiho a ni. Tarlan danin, tunah hian Power & Electricity department hi corporation-ah lut turin hmalak zel a ni a, a bul ṭan nan strategic business unit (SBU) pathum - Generation SBU, Transmission SBU leh Distribution SBU-ah ṭhen (unbundling) phawt tura hmalak a ni.