Kawng dunga thil zuar ṭhinte'n thil zawrh duhin kawng an dang

June 21, Inrinnia Aizawl Tennis Court leh Horticulture Directorate bul kawngpuia thil zuarte chu Aizawl Municipal Corporation (AMC)-in an thil zawrhte an khâwmsak a; thil zuartute chuan lungawi lohna lantir zuiin, kawngpui an dang a, tlai dar 5 vel aṭangin kawng dungah thil an zuar leh bawk.

AMC chuan March 27, 2025 khan thuchhuah siamin, Mizoram Legislative Assembly, Dâk Inpui, FCSCA Directorate, Horticulture Directorate, Agriculture office leh Tennis Court chhehvel kawngpui kamah thil zawrh a khap. Khapna hmuna thil zuar ṭhinte chu AMC Multi-Complex Building, Tuikual South-ah insawn vek turin a hriattir nghal bawk.

AMC hian May 8, 2025 khan thuchhuah siam lehin, Mizoram Legislative Assembly building leh a chhehvel chu Mizoram Municipalities Act, 2007 Section 308 hmangin thil zawrh khapna hmuna puan a nih thu a tarlang a, "Khauh taka kenkawh chhunzawm a ni ang," a ti.

Dan leh thupek zâwm loa dan bawhchhiate chu Rs 5,000 thleng chawitir leh an thil zawrhte man theih a nih thu AMC chuan a tarlang a; thupek bawhchhe lo turin thil zuarte a chah bawk.

AMC-in a khapna hmunahte hian hun eng emaw chen thil zawrh a ni tawh lo a, mahse, tun hnaiah thlai zuar an awm leh ṭan a; Aizawl Tennis Court leh Horticulture Directorate inkar vela thil zuar ṭhinte chu June 21, Inrinni zing khan AMC chuan police punin an thil zawrhte an khâwmsak ta a ni.

Thil zuartute chu lungawi loin, zing dar 9:30 vel aṭangin Aizawl Tennis Court bul traffic point zawn velah kawngpui an dang zui a; Aizawl khawpuiah, a bikin Aizawl chhim lamah traffic jam a nasat phah hle.

Kawngpui dunga thil zuartute chuan AMC chu miretheite rapbetah puhin, "Vawi tam tak kan dawr tawh chung pawhin inzawrh an phal lo," an ti a, AMC chu ṭhiah an phût.

Thil zuar ṭhinte hian tlai dar 5 vel thleng kawngpui an dan hnuah, kawng dungah harsatna awm loin thil an zuar zui leh a ni.

Thil zuartute chuan Vanglaini zawhna chhangin, AMC-in bazar tur a sak sakah hian an len vek loh thu an sawi a, "Bazar tharah insawnthla turin min ti a, kan insawn thlaa, ṭhutna hmun kan inchan leh si loh avangin bazar chhung step sirahte min ṭhut tira, mipui veivak an inpel hlei thei lo ṭhin. Ruahmanna kan siam ang an ti a, thla 2/3 kan nghak tawh a, tun thlengin ruahmanna an la siam lo. Bazar chhunga mipui tana pan awlsam leh hmun awlzau lai ber lah garage atan an hmang bawk si," an ti.

Bazar thar a tawt avangin kawngpui sirah an ṭhut loh theih loh thu sawiin thil zuartute chuan, "Ni tin ṭhut kan tum bik lo a, kan beisei ngam lo hrim hrim. Sorkar chawlh a nih avangin Inrinni bikah chauh ṭhut kan beisei a ni," an ti a, chhungkaw chawma thawk an nih ve tho avangin sorkarin ruahmanna siam sak vat se an duh thu an sawi.