Sorkar laipuiin AAY leh PHH tan A thlâwnin buhfai sem dawn

Sorkar laipui chuan Pradhan Mantri Garib Anna Yojana (PMGKAY) hnuaiah Antyodaya Anna Yojana (AAY)-te leh National Foor Security Act (NFSA) hnuaia Priority House Holds (PHH)-a awmte tan mi pakhat zelah buhfai kg. 5 zelin thla thum chhung - April, May leh June atan a sem dawn a, April leh May thlaa sem tur chu a ruala sem tur a ni ang.

Food, Civil Supplies & Consumer Affairs Director chuan, April leh May quota a ruala sem tur a nih avangin DCSO zawng zawngte chu AAY leh PHH beneficiary-te tan mi pakhat zelah kg. 10 allotment siam turin nimin khan a hriattir.

Buhfai hi April 27- May 9 chhungin retailer-te'n an sem theih nan supply centre-ah pek chhuah hman tum a ni.

Buhfai sem dan tur•PMGKAY ration hi retailer-te hnenah a thlawn a pek chhuah tur a ni a, retailer-te'n beneficiary-te hnenah a thlâwnin an sem zui ang.

•Fair price shop allotment zawng zawng chu digitized data (20.4.2020) nen a inmil thlap tur a ni a, allotment copy chu local task force-te hnenah pek tur a ni.

•Fair price shop-te'n dan angin ration lâk theih hun pangngai an kalpui tur a ni a, task force-te nen inberáwnin sem hun an siam thei ang.

•Allotment order tihchhuah a nih rualin departmental transparency portal mizorampds.nic.in ah upload nghal tur a ni.

•DCSO/SC incharge-te'n dan pangngai angin DO an issue ang a, chu chu fair price shop-te'n carrying bill dil nan an hmang ang.

•Fel taka buhfai sem a nih theih nan leh report and returns mumal tak thehluh a ngaih dawn avangin DCSO leh centre i/c zawng zawngte mahni centre chhuahsan lo a, an hnuaia retailer-te uluk taka buhfai sem enpui tura hriattir an ni.

•Buhfai a thlàwna sem tur hi supply centre ṭhenkhata buhfaia dawng kim hman lo an awm a nih chuan stock neih sa aṭanga pek chhuah mai tur a ni.

•Retailer zawng zawngin felfai takin pro­forma duan sa angin an sem dan leh sem zat chiang takin task force leh bialtu centre i/c hriatpuina counter signature nen bialtu DCSO-ah an thehlut tur a ni. DCSO-te'n an hnuaia retailer-te'n quota an sem kim lo emaw, an pe kim lo emaw a nih chuan fair price shop hming leh sem kim loh zat ziakin directorate-ah a rang thei ang berin a hriattir ang.

•PMGKAY hnuaia buhfai a thlawna sem hi mipuiah a tam thei ang ber puanzar tur a ni a, district tina IPRO-te leh veng tina khawtlang hruaitute hma la ho tura beisei an ni.