Private hospital-te'n hriat famkim loh leh hriat chian loh an nei – MSHCS

Mizoram State Health Care Society (MSHCS) chuan thuchhuah siamin, private hospital intelkhawm pawl, Non-Government Hospital Association, Mizoram (NGHAM) te'n Mizoram Universal Healthcare Scheme (MUHCS)-ah hriat famkim loh leh hriatchian tawk loh an neih thu an tarlang.

MSHCS chuan, NGHAM-te'n June 17, Thawhlehnia thuchhuah an siamah thil hriat famkim loh leh hriat chian lohte awma a lan nual avangin sorkar chuan mipui hriat atana thil awm dan dik tak tarlan ṭha a tih thu tarlangin, "Private hospital intelkhawm pawlte hian cashless avangin ni tin sum lut awm lo tura an ngai hi sorkar lam chuan cheng nuai 50 advance-a pek a inhuam reng. Tin, kar tinin damdawi-in bill hi pek ṭhin a ni a, an buai lo turah a ngai," an ti.

MUHCS rate hi 50%-80% vela hniam zawk anga sawi chu hriatchian loh vang nia a lan thu tarlangin MSHCS chuan, "Entirna pakhat han tarlang ila - Aizawl chhunga private damdawi-in lian aṭanga kum hmasa lama claim kan dawn aṭanga chhûtin, rilphir zai senso chu chawhrualin Rs 36,250 (room luah man telin) a ni," an ti a, MUHCS hnuaiah hian rilphirzai hi base rate Rs 25,000 tih ni mah se, heng damdawi-in lianah hian additional incentive an dawn tur zat nena belhkhawmin rilphir zai package rate hi Rs 32,500 aṭanga Rs 35,000 thleng a ni thei tih an tarlang.

MSHCS tarlan danin, damlo chu a entitlement a zirin cabin-ah emaw semi cabin-ah a awm a nih chuan room man hi package rate tarlan piah lamah hian damdawi-in ten an bill belh thei. Chuti chuan, room luah man nen chuan Rs 36,250 ai hian a sang zawk dawn a ni.

Phai lam hospital leh Mizoram private hospital-te hi rate chungchangah te, quality chungchangah te, grading chungchangahte khaikhin chi a ni lo. Chutichung chuan sorkar chuan, Mizoram private hospital-te chu duat takin phai lam hospital-te nen rate inang tlâng a zawrh (offer) bakah, hemi piah lamah pawh hian sawipui a la inhuam cheu a ni.

MSHCS tarlan danin, phai lam non-empanelled hospital-te reimbursement phalsak anga sawi hi a dik ziktluak lo. MUCHS guidelines 3.12.2/10.3.2 ang chuan emergency-ah emaw empanelled hospital-ten an enkawl theih loh natna bikah chuan phai emaw Mizoram chhung pawh ni se, non-empanelled hospital-ah chuan reimbursement theih reng a ni.

Mipui nawlpui, a bikin mi harsa zawkte leh sorkar hnathawk tam takte chuan damloh nikhuaa inkhul chhuahna tur sum an neih loh dan te, puk chawpa inkhul chhuakte leh, mahni in leh lo hial tih ral ngai khawpa mangangte an awm ṭhin tih a hriatpui avangin sorkar chuan cashless-in mipui healthcare hi a kalpui mek. Hei hi sorkar chuan mipui tan ṭha a ti hle a ni.

Sorkar chuan mipuite hmakhua ngaiin private hospital-te nen inrawn tlanga, dawhkan khat kilhoa inbiakremna kawng zawn zel hi a duh dan a ni.