College of Horticulture dincham lawm

College of Horticulture Thenzawl chuan nimin khan an college-ah an dinchampha vawi 9-na an lawm a; Agriculture minister PC Vanlalruata'n a hmanpui.

PC Vanlalruata chuan, College of Horticulture Thenzawl din champha vawi 9-na lawm theia an awm chu thawktute leh zirlaite ṭhahnemngaihna vang a nih thu a sawi a, "Zirtirtu ṭha tak tak leh state hrang hrang aṭanga lokal zirlaite thawhrimna avangin he college hi zirna-in ṭha tak leh zirlai ṭha tak tak chherchhuak tu a ni," a ti a, Mizoram tan hmasawnna thlentu pawimawh tak ala ni chho zel dawn tih a sawi.

Agriculture lama zirna leh thiamnate chu loneitute leh kut hnathawktute hlawhtlinna thlentu a nih thu sawiin Minister chuan, "He college ngei pawh hian in thiamna hmangin kut hnathawktute vawi tam tak in lo ṭanpui tawh ṭhin a, in thiamna leh theihnate Mizoram mipui tan ṭangkai taka hmang chhunzawm turin ka ngen duh che u a ni," a ti.

College of Horticulture dean Dr Shri Dhar pawhin thu sawiin, horticulture chu Mizoramah hmasawnna thlentu pawimawh tak a nih thu leh Mizoram sum leh pai dinhmun tisangtu ala nih chhoh zel a beisei thu a sawi.

College of Horticulture hi June 18, 2016 khan Selesih-ah din a ni a, July 1, 2019 aṭangin tuna an awmna Thenzawlah hian an awm ṭan a ni. An college hmunhma (campus) hi hectare 120.38-a zau niin, thawktu - dean pakhat, associate professor pakhat, assistant professor 13, non-teaching staff paruk, contructual staff 16 leh security 12 an awm. Zirlai mipa 39 leh hmeichhia 57, an vaiin 96 an awm mek a; College of Horticulture-ah hian Mizoramin kum tin quota/seat paruk a nei mek a ni.