North-East Power Conclave-ah Minister F Rodingliana a tel

Nimin khan Indian Electrical and Electronics Manufacturers' Association (IEEMA) chuan nimin khan Guwahati-ah North-East Power Conclave an buatsaih a, Power & Electricity minister F Rodingliana chu khualzahawm a ni.

Conclave hawn inkhawmah F Rodingliana chuan ZPM sorkar party manifesto chu power-a intodelh a nih angin Mizoram sorkarin chak takin hma a lak mek thu sawiin, hydel project leh solar hmanga kawlphetha tam zawk thar chhuak tura bul an ṭan mekah IEEMA member-te chu Mizoram power sector-a investment tam zawk ti turin a ngen.

Power Minister chuan solar power generation chungchanga Mizoram sorkar hmalak meknate tarlangin, "Solar plant siamna tur Mizoram hmun hrang hrangah ruahman tawh a ni. Solar plant bunna tur ramte hi a thlawna hman hawh tir tur niin, 1st phase ah solar plant bunna tur expression of interest hmun nga atan chhuah tawh a ni a, a dangte pawh a tahtawla hmalak zel tur," a ti a, he hmalaknaah hian IEEMA member-te tel (participate) turin a sawm.

Mizoram Power secretary K Lalrinzuali pawhin thu sawiin, Mizoram chu tlangram kilkhawr, fur ruahtui tam na hmun a nih avangin Mizoram mil tur equipment leh bungraw zangkhai leh daihrei, duang chhuak turin IEEMA member kalkhawmte chu a chah.

IEEMA hnuaiah hian India rama electrical leh electronic bungrua siam chhuaktu company tam zawk an in ziaklut a, India rama heng bungrua siamchhuah 90% chu member-te kut chhuak a ni. Tun dinhmunah hian member 1,200 chuang an awm mek a ni.

Ni 2 awh North-East Power Conclave ah hian India rama electrical leh electronic bungrua siam chhuaktu langsarten an product tharte an pho chhuak a, North East-a power sector hmasawnna tur thil pawimawh hrang hrangte sawiho a ni.