Zo Meat phochhuahna hun buatsaih

Nimin khan MIFCO leh Zo Meat ṭangkawp hmalaknain Modern Abattoir, Bungbangla, Zemabawkah Zo Meat phochhuahna hun buatsaih a ni a, adviser to chief minister TBC Lalvenchhunga'n a hmanpui.

TBC Lalvenchhunga chuan, food processing-ah hian training hrang hrang buatsaih ṭhin a nih thu sawiin, 'Mizoramah chuan self help group-te hi kan innghahna ber an ni leh ṭhin. Vawiina MIFCO leh Zo Meat ṭangkawpten hma thar an la hi kan ram tan hmasawnna bungthar niin ka hria. MIFCO-in midangte tana eizawnna kawng an hawnsak hi ropui ka ti a, an hmalakna hian kan ram tan rah ṭha a chhuah ngei ka beisei ," a ti.

ASF vawk pul hri avanga harsatna tawk mi pathum intel khawmten Zo Meat hi dinin, phai lamah meat processing training an neih hnuah MIFCO hotute nen indawrin, ruahmanna leh thawhhona dan turte sawiho a ni. Mizoramin sa thianghlim leh hrisel ei tur a neih theih nan ngaihtuahna hrang hrang an sengho a ni.

Zo Meat hian product chi hrang panga an nei dawn a, chu'ngte chu - pork fresh cut, pork sausage, smoked pork, chicken sausage masala leh chicken sausage breakfast-te an ni.