RD Minister-in VC hruaitute a kawm

Rural Development & Administration minister Prof. Lalnilawma chu nimin khan a pisaah All Mizoram Village Council Association (AMVCA) hruaitute'n an kawm a; VC-te thuam chakna tur leh VC-te hlawh ennawn chungchang an thlen.

Prof. Lalnilawma chuan, VC hruaitute chu khawtlang tihhmasawnna tura mipui aiawh tura thlan an nih angin hmasawnna hna kalpuina kawnga hmanraw pawimawh tak an nih bakah, endiktu leh viltu pawimawh tak an nih thu a sawi.

RDA Minister chuan VC-te ngennate chu khawtlang inkaihhruaina kawnga VC-te thuam chak lehzualna tura thil pawimawh tak a nih thu sawiin, department dangte nena inrawnkhawm ngai a nih dawn avangin theihtawpa a bawhzui sak tur thu a hrilh.

AMVCA hruaituten RDA Minister hnena ngenna hrang hrang an thlen langsar zualte chu - Aizawla Village Council Chawlhbuk sak te, Mizoram House hrang hranga VC member-te tana hmaṭhatna siam sak te leh VC tharte'n 15th Finance Commission hnuaia an huam chhunga hna an thawh ve theihna turte a tel.

Village Council mawhphurhna dah pawimawh lehzual a ni theih nana VC dan ennawn leh siamṭhat a ni chu an lawm thu RDA Minister hnenah hian AMVCA hruaitute chuan an sawi.